१७ जेष्ठ, काठमाडौं । नेपालगञ्ज उप–महानगरपालिकाका मेयर डा. धवलशमशेर राणाले लुम्बिनी प्रदेशको रिक्त एक सिटका लागि आज भइरहेको राष्ट्रिय सभा उपनिर्वाचनमा आफूले मतदान नगर्ने बताएका छन् ।

दाङमा बिहान ९ बजेदेखि उपनिर्वाचनको मतदान भइरहेका बेला राणाले सामाजिक सञ्जालबाट निर्वाचन आफ्नो प्राथमिकतामा नपरेको र मतदान नगर्ने निर्णय गरेको जानकारी दिएका हुन् ।

सामाजिक सञ्जालमार्फत् राणाले भनेका छन्, ‘मेरो अहिलेको पहिलो कर्तव्य कोरोनासँग जुध्ने रहेकाले काँग्रेस, एमाले र माओवादीको यो अवस्थामा भइरहेको जुधाईलाई मैले मतदान गर्न नसक्ने निर्णय गरेको छु ।’

राष्ट्रिय सभा सदस्यको रिक्त सदस्यका लागि नेकपा एमालेका चन्द्रबहादुर खड्का र नेपाली कांग्रेसका दृगनारायण पाण्डे चुनावी मैदानमा छन् ।

राणा राष्ट्रिय प्रजातन्त्र पार्टीबाट नेपालगञ्ज उप–महानगरपालिकाको मेयरमा निर्वाचित भएका हुन् । उनीसहित लुम्बिनी प्रदेशमा राप्रपाका दुई जना जनप्रतिनिधि रहेका छन् ।

आजहुने लुम्बिनी प्रदेशको राष्ट्रियसभा सदस्यको उपचुनाव मेरो प्राथमिकतामा परेन।मेरो अहिलेको पहिलो कर्तव्य कोरोनासंग जुध्ने रहेकोले काग्रेस,एमाले र माओवादीको यो अबस्थामा भईरहेको जुधाईलाई मैले मतदान गर्न नसक्ने निर्णय गरेको छु,धन्यवाद!!

— Dr.Dhawal Shumshere Rana (@ShumshereDhawal) May 31, 2021