१ आश्विन २०८०, सोमबार

उमेश राउतको संगीतमा चर्चित गायक स्वरुपराजले गाए ‘तिम्रो तस्बिर’ (भिडियोसहित)



२० फागुन, काठमाडौं । नवगायक तथा सङ्गीतकार उमेश राउतको सङ्गीत र उज्ज्वल हृदयको शब्दमा ‘तिम्रो तस्बिर’ बोलको गीत सार्वजनिक भएको छ । लोकप्रिय गायक स्वरूपराज आचार्यको स्वरमा रहेको हृदयस्पर्शी गीतको भिडियो उज्ज्वल हृदय यूट्युब च्यानलबाट सार्वजनिक गरिएको हो ।

चोखो प्रेममा असत प्रवृत्तिका व्यक्तिहरूको प्रवेशले निम्त्याएको समस्यालाई यस गीतले देखाएको छ । प्रेम अनि विछोडको विषय भए पनि त्यसलाई फरक किसिमले प्रस्तुत गरेर नेपाली गीतका श्रोता र दर्शकलाई फरक किसिमको स्वाद प्रस्तुत गरेका बताउँछन् गीतकार उज्ज्वल बस्नेत ‘हृदय’ । नेपाली साङ्गीतिक क्षेत्रमा क्षणिक चर्चा बटुल्नुभन्दा पनि यस क्षेत्रलाई सुगम तथा फराकिलो बनाउँदै लैजानु आफ्नो प्रमुख उद्देश्य रहेको उनको भनाइ छ ।

चार वर्षदेखि लाबोली प्रमोदसँग सङ्गीतको शिक्षा लिँदै आएका सङ्गीतकार उमेश राउत भन्छन्, ‘छोटो समयको लोकप्रियताभन्दा पनि आफ्नो रचना सदैव अमर रहोस् भन्ने उद्देश्यका साथ गीत तयार गरिएको हो, अहिले सीमित नयाँ पुस्ताहरू रातारात लोकप्रिय बन्ने उद्देश्यका कारण आफ्नो मौलिक सङ्गीतलाई बिर्सिएर भाइरलको पछाडि दौडिएका छन् तर हामी त्यो बाटोमा छैनौँ ।, नेपाली गीत सङ्गीतको आफ्नो छुट्टै पहिचान छ, त्यसमै रहेर हामी अघि बढ्न चाहन्छौँ । त्यसकै फलस्वरूप ‘तिम्रो तस्बिर’ आएको हो ।’

चर्चित मात्र नभएर नेपाली सङ्गीतमा छुट्टै उचाइ बनाउन सफल गायक स्वरुपराज आचार्यले नयाँ पुस्ताले यस्ता किसिमका सङ्गीतमा रुचि राख्नु निकै सकारात्मक भएको बताए । गीतका बारेमा बोल्दै उनले भने, ‘नेपाली सङ्गीतमा लोप हुँदै गएको रुपक तालको प्रयोग यस गीतको विशेष पहिचान हो, अझ अरेन्जमेन्टमा भएको एउटै गीतमा तीनवटा तालको प्रयोगले यस गीतको महत्व झनै बढेको छ ।’

कपनमा निर्माण छायाँकन उक्त भिडियोमा गीता ढुंगाना र निराजन प्रधानको जीवन्त अभिनय देख्न सकिन्छ । अहिलेका चर्चित निर्देशक अनुप चापागाईंले निर्देशन गरेको गीतको भिडियो समेत उत्कृष्ट बनेको छ ।

अकोस्टिक नेपाल रेकर्डिङ स्टुडियोमा रेकर्ड गरिएको ‘तिम्रो तस्बिर’ अजयसिंह कार्कीले रेकर्ड गरेका हुन् भने प्रकाश मिश्रले ध्वनी सम्पादन गरेका हुन् । लाबोनी प्रमोदको सङ्गीत संयोजन रहेको गीतको भिडियोलाई बुद्ध थापाले छायाँकन गरेका हुन् भने विकास दाहालले सम्पादन गरेको हुन् ।

भिडियो हेर्नुहोस् :


प्रतिक्रिया दिनुहोस !

थप खबरहरु

धेरै पढिएको