१५ पुस, काठमाडौं । अमेरिकाकी नव–निर्वाचित उप–राष्ट्रपति कमला ह्यारिसले कोरोना विरूद्धको खोप लगाएकी छिन् ।

मंगलबार उनले कोरोना विरूद्ध लगाएको खोपलाई टेलिभिजनबाट प्रत्यक्ष प्रसारण गरिएको थियो । ह्यारिसले मोर्डनाले बनाएको खोप लगाएकी हुन् ।

अमेरिकामा कोरोना खोपलाई लिएर आमअमेरिकी नागरिकमा रहेको संशयलाई चिर्न त्यहाँका राजनीतिज्ञहरूले प्रत्यक्ष खोप लगाउने गरेका छन् ।

खोप लगाइसकेपछि कमलाले आफूलाई कतिखेर खोप लगाइसकियो भन्ने थाहा नै नभएको प्रतिक्रिया दिएकी थिइन् ।

‘म सबैलाई यो खोप लिन भन्छु । यो लगभग दुखाइबिनाको छ । यो सुरक्षित छ, मलाई वैज्ञानिकहरूमाथि भरोसा छ’, उनले भनिन् ।

(स्रोत : एजेन्सी)