३१ साउन, काठमाडौं । नेकपा माओवादी केन्द्रले पहिलो पटक व्यवस्थित विधानको मस्यौदा ल्याएको छ । पार्टीका अध्यक्ष पुष्पकमल दाहाल (प्रचण्ड)ले केन्द्रीय कमिटी बैठकमा ५२ पृष्ठ लामो विधानको मस्यौदा पेश गरेका थिए ।

पार्टीको अन्तरिम विधान–२०७८ नाम दिइएको उक्त मस्यौदा बैठकबाट पारित भएपछि कार्यान्वयनमा जानेछ । विधानमा अधिकांश बुँदाहरु साविकको नेकपाकै मोडलअनुसार छन् ।

माओवादीको अन्तरिम विधानमा पनि नेकपा एमालेले अवल्बन गरेका संगठनात्मक संरचना र ढाँचाजस्तै छ । तर, माओवादीले भने वैकल्पिक सदस्यको प्रावधान भने उल्लेख गरेको छ ।

नयाँ व्यवस्था अनुसार केन्द्रीय समितिको सदस्य संख्या २९९ बनाइएको छ । उक्त समितिले चयन गर्ने पदाधिकारी र केन्द्रीय समितिमा महिलाको प्रतिनिधित्व भने ३५ प्रतिशत अनिवार्य गरिएको छ ।

त्यस्तै माओवादीले सेल कमिटीदेखि केन्द्रीय समितिसम्मको सदस्य संख्या पनि निर्धारण गरेको छ ।

माओवादीको जिल्ला समिति ९९ सदस्यीय, विशेष जिल्ला समिति ६५ सदस्यीय र महानगर समिति ९९ सदस्यीय रहनेछन् ।

त्यस्तै उपमहानगर समिति ८१,नगर समिति ६५,गाउँ समिति ५५ सदस्यीय रहनेछन् । सबैभन्दा तल्लो तह पार्टी सेल ११ सदस्यीय हुनेछ विधानमा उल्लेख छ ।