१५ मंसिर २०७८, बुधबार

रूपाविरूद्ध भ्रामक समाचार लेख्ने ६ वटा अनलाइन बन्द गर्न काउन्सिलको पत्र



१५ असार, काठमाडौं । रूपा सुनारविरूद्ध भ्रामक समाचार लेख्ने ६ वटा अनलाइन बन्द गराउन प्रेस काउन्सिल नेपालले नेपाल दूरसञ्चार प्राधिकरणलाई पत्राचार गरेको छ।

प्रेस काउन्सिलले मंगलबार नेपालभित्र उक्त अनलाइन पत्रिका प्रकाशन र प्रशारण हुन नसक्ने गरी प्रबन्ध मिलाउन भन्दै प्राधिकरणलाई पत्राचार गरेको हो । काउन्सिलले खबरमाला, कालापानीपोष्ट, मिडियाट्वान्टीपोष्ट, ग्यालेक्सी सेभेन एक्सप्रेस, आजको नयाँ, साँझा मिडिया डटकमलाई एकै पटक बन्द गराउने निर्णय गरेको हो ।

सुनारले आफूविरूद्ध अफवाह फैलाएको भन्दै काउन्सिलमा ९ वटा मिडियाविरूद्ध उजुरी दिएकी थिइन्। उनले अनलाइनले अफवाह फैलार्इ जातजाति, धर्म वा सम्प्रदायबीचको सम्बन्धमा खलल पुर्‍याउने र जातीय छुवाछुत एवम् लैंगिक भेदभावलाई दुरूत्साहन गरेको भनी निवेदन दिएकी थिइन।

सुनाले जातीय दुर्व्यवहारको विरोध गर्दा युरोपियन युनियनबाट उचालिएको, पैसा खाएकोलगायत भ्रामक सूचना प्रकाशन र प्रशारण गरी अफवाह फैलाइएको उल्लेख गरेकी थिइन्। कोठा खोज्न जाँदा थरकै कारण घरबेटीले कोठा भाडामा नदिएको भन्दै उनले सरस्वती श्रेष्ठविरूद्ध उजुरी दिएकी थिइन्। अहिले घरबेटी श्रेष्ठ रिहा भइसकेकी छिन्।


प्रतिक्रिया दिनुहोस !

थप खबरहरु

धेरै पढिएको